Home Letters Imaginary Love. 1.7

Imaginary Love. 1.7

43
0
SHARE

S,
Ninkuramusya ngumize nti, ori buhoro? buhorogye? Oriyo? Toyine nshonga?

Ijoo, obunkugira nti nkaba nyine ekyitekateko kyomuringo gwomutaano ogu nakuhandikiremu ebaruha yamushanzu erakureke wena otangire, nkaba nimanyisa ngu ninyenda nkuhandikire omu rurimi rweitu nyamurungi orwenzarwa.

Nkashemererwa munonga obu wamanyisa ngu abazire baawe nirwo rurimi rubabegyise kandi orumukukozesa omuka yanyu. Tikyangu kubugana abantu abakurire omu myaaka yeitu yebyoma bya kanyabwengye abarukugamba orunyankole.
Nitwe (ba Twinokwesiga) nikyo kyimwe kwonka ahabwokushanga ngu tukashomera omu mashomero gabanyamahanga tuturatungire abantu bokurugamba nabo. Mpaho rwafa.

Empereruka, omuntu nkanye akahendera ayine ebirabo byokugamba nana okuhandika orungyereza, banyanya bangye bahendera batungiire ebyokugamba kurungi oruzungu, orufaransa nanorugirimani mpaka omumwaka gwa enkumi ibiri namwenda obu nasharamu kwetwara mpora mpora nkega okugamba, okushoma nana okuhandika orunyankole. Rukaba nurunshansha enshaya. Owabire nangabira ntakumukyenga osha oti ariyo nanjuma. Nkaba nyine okuhinduraho obunafuna omugisha kutula omukyalo kumala ogwo mwaka gwona.

Nobundaabe ninkishobyamu, ebigambo nkabihandika nkokundikubihurura, nyine amasiko ngu tindashwaze abekyika kyitu, nana abanyakole boona, namunonga omu maisho gempangare nungyi nkiwe.

Mbiire ninyenda kukuhandikyira obu mbeire nkyiri omukyaro kwonka nashanga ndigyireyo nyekyiro nikwo kushanga ndiyo ninkuhandikira eshaha nkegyi (hasigarayo edakyika ikumi kuba shaaha ikumi nibiri zomukashehe) ahabwokuba ninkunda kutandika eizoba ryangye nana okukora ebintu ebyamani narishi ebindiire nintekatekaho, ningashi ebiri aha mutima gwangye.

Abagurusi abuwambulize bariyo, bashemereirwe nobubarabe bateine maani ahabwemyaka eyi bahisya. Bukuru nefire kwekuba yizire nekureta. Obwongo nibuyaga, okweba noba number one, oyebwa munonga kandi juba, nana ebyokukora byoona tiharimu makuru nibishana ebyaberere.

Nkabire ninkoma aha – orunyankole rwiine ebigambo byingyi kandi biringwa – kwonka kundebire ekishani kyawe nana akerere karungi aha mukuto gwa Facebook (ekinagita aha baruha egyi), nakikunda munonga. Oyihireho ago misho gawe marungi nkagenyina, kyinyorokire kimwe aha bintu bitwikwikirizamu – ntura ninyenda kukiriza omu ngaro zangye omwana owu nyowe nomukundwa wangye turizara – kandi kyanyijusya kimwe aha bityebyo ebi omuzeyi Tinkabimanyire agambiire.

Batatenkuru bangye bakaba biine enshoni, batakubasa kugambira bishiki. Bakaba baterondora bakazi. Bakaba batakyenda ngu omusigazi abuuze omwishiki wabandi engyonsho nari emikywe emibi. Abazire bomusigazi bakaba nibamanya eka egyo eyokuza kushweramu, kandi baragyigyiremu. Bakaba bareba omwiki ku arabe nahinga, nabasa kukufungurura obushera. Bareba ngu enkwata yomwiki ogwo yaaza omuka yaawe naterera nakora ebyakazi bakola nkokuhinga, okutaha amiizi, okusa oburo, okuteka ebyokurya nana okugaburira abantu. Niyo emirimo eyabire emuresire.

Amahanga agandi gakaba giine entwaza erikumanya nka okuliima. Ababire nibalima abamwe bakaba nibaliimila omumisiri. Ekyigyendererwa kikaba kiri kureba owishiki yaba nabasa efuka.
Okuliima okundi bakaba baliimila aheru yamaju geka erimu abiiki omubeire bwekyiro kuhurira ebinyampo byabo kwenda kumanya baba nibaragye, kandi baba bari abakozi barungi.
Okuliima okundi bakaba baliima kurugirira aha mitwarize yabishiki nana emikywe yeka yabo.

Abasigazi kubabire baliima, baheza kusiima, bajumba ninga eka bagyitera oruhoko, bagyihamu omukazi.
Ningashi, kuwabire omureba omukazi, wamukunda ogambira sho nari ahabwokutina sho, ogambira shwento oti “omwishiki ogwo nimukunda. Niwe ndikwenda kushwera”. Deru bamukugambirira obugyenyi.

Obwire bwakare, omwishiki kumanya ngu nomukunda, omusigazi okaba okwata omwiki aha ibere kikumanyisa ku wamukunda, obundi omushenyera oruba rwenku, obundi bakiba baza kwiha obunyasi omwihiraho, oguma namukwata aha ibondo, nomukwata aha kibunu, mumwenyerena aha matama, mutayayirana kworeka omwiki ogwo ngu iwe omusigazi wamukunda.

Obwo nobwire bwakare, ebya amabaruha ebyaresirwe okushoma bikaba bitakizire. Hati nyowe nimbasa kukugambira ngu ninkunda kibure nokugira amakuru, nobasa nokwanga kukishoma, nari wakishoma obure kukyikyenga nkoku kyakubire nikyetagyisibwa.

Nanye obu nabire nkyiri muto nkaba ngyira enshoni, nkaabo bashwenkuru bangye, kwonka obu turi omu bwire bwokuhandika amabaruha, obwire obu twine kukozesa ebigambo kwohoreza obutumwa bwitu aha bantu abandi, obwire obu tukutura nabazire bitu, tinyine kyindi kyokukora nkabo abakare kwihaho okweyihaho enzo nshoni deru nkabona okunakugambira ekyinyine aha mutima.

Mbenu B, “omukuliima” okwangye okumbire ninkora, obumwe ntakugyenderire, nsiimire ebindebire nana ebigambo byawe ebindebire kandi nkashoma – nkoku ntwire ninkugambira.

Nikwo natandikire kukunda kandi naba ninyenda, hatariho okubuzabuza na okuburabura kandi kitakanigire amaraka kandi niwe kwenda ngu otakagira obutamanya nkugambire ngu: ninkukunda, nkwinire rukundo nyingyi, omwoyo gwangye gukusimire kandi omubiri nagwo gukutegyerize nana omujinya mwingyi. Buri izoba ningyezaho kukora empinduka omumagara gangye ahabwokuba nyine ekigyendererwa kyokugira ngu kworisharamu wanshanga, oryashanga ninga obugane omushaija woburyo.

Kandi iwe kworisima, nana ruhanga na abazire biitu kubarisima niiwe oriba nyiina wabana bitu ababonire abiturizara, tukabakyiriza nkogwe owoyine omu kashani, kandi tukaborera kurugamu abantu barungi abine omugasho. Ekyo nikyo kyiroto kyangye ekirikusingayo omuri byoona.

Kangyire ngu nagyezaho okuhandika gye kandi nakusigyira obutumwa bwokutekyerezaho.

Ninkwendeza okwezi kwa Muzimbezi kwamashemererwa mingyi namunonga ahakyiro kyamazarwa gawe obu abazire bawe baha egyi ensi ekirabo nkiwe.

Ninye orikukukunda,
Twinokwesiga.

LEAVE A REPLY

Please enter your comment!
Please enter your name here